周汶錡（Kathy）同法籍老公Julien今年聖誕由三人世界，變為四人世界，皆因除咗兩歲幾大仔雷棨宇(Jacques)，今年3月就再添細仔雷棨博(Avner)。有咗兩個得意混血BB，聖誕更添熱鬧氣氛，笑言除要搞大人聖誕派對，今個聖誕開始要準備埋小朋友版party。
着灰色襪仔嘅係細佬Avner。
媽咪Kathy同Avner玩紙哨。
聖誕對於Kathy一家嚟講係重要節日，皆因佢老公係法國人，聖誕等於中國人過農曆年咁重視，佢哋會準備聖誕大餐，食火雞就梗係指定動作，更一早買定棵9尺高聖誕樹，佢話未有小朋友前屋企都會擺聖誕樹：「o依家聖誕樹會有唔同主題，以前好多玻璃嘅嘢，o依家驚打爛會變晒布同冷嘅嘢，擺棵聖誕樹好似新年擺棵桃花咁好應景，老公話屋企有小朋友，有聖誕樹好warm，加埋落雪仲好，不過香港搬到去大帽山都無雪。」
大仔Jacques就好細心將啲動物、雪人同聖誕襪嘅布料吊飾掛上聖誕樹，又會走去同差唔多身高嘅雪人公仔玩，吹住聖誕裝飾嘅紙哨通屋走，而就快9個月大嘅細佬Avner就好淡定慢慢爬去搵媽咪，坐定定影相，兩兄弟一動一靜。做訪問時，Jacques聽到聖誕歌會哼兩句、擺動身體，Kathy指Jacques已識哼幾句Jingle bell、Santa Claus is coming to town，Kathy笑言Jacques兩歲好活潑，仲同佢講要乖啲，聖誕老人先會嚟探佢同送禮物。
哥哥jacques都有一個，玩埋一份。
聖誕節要同Jacques講故仔，Kathy就話有老公負責：「爸爸同佢哋講好多，咩係聖誕老人、聖誕襪，點解有聖誕樹，如果你乖就有聖誕老人擺禮物去聖誕襪入面，呢個節日都幾開心，尤其是我老公係西方人，法國人對聖誕好似我哋對農曆新年咁，會準備好多禮物，每人都會有禮物，放喺聖誕樹下面，會交換禮物，似我哋派利是咁，傳統加上連埋新年，變咗係好傳統、好開心嘅holiday。」
Jacques之後就幫手裝飾聖誕樹，Kathy話呢個節日好傳統，老公好重視。
佺節親朋戚友都會送禮物畀兩個囝囝，Kathy反而叫朋友唔好送怕浪費，覺得簡簡單單一家人喺聖誕樹下影相留下美好回憶已好開心。今年Kathy一家會留港過聖誕，新年後先去過白色新年，到時老公會帶大仔學滑雪。小朋友多禮物收，問到Kathy會唔會少咗收禮物？
佢就話夫家一家人都會嚟香港慶祝，外國人興交換禮物外，老公Julien都一定有準備禮物畀佢，佢就笑笑口話：「老公會送啲唔啱禮物，我會同佢講『你不如問下我先啦。』試過買隻錶我有兩隻同款，不過金同鋼，係咪多咗，不如我自己揀番。我通常送衫畀佢，知佢想着咩，音響、大人玩具佢都有。」
錫錫媽媽咪最好既禮物!
(蘋果日報)
