陳志雲近日除咗為復活嘅亞視主持《百萬富翁》之外，重同甄詠蓓及音樂人林家謙為網台「OpenSky.tv」主持《大開眼界》節目，除咗講飲講食之外，志雲重大爆電視台秘史，呢個節目會喺今個月28日出街
身兼多職做網台、商台、亞視主持、舞台劇，出年2月又會帶團去北歐睇北極光，問佢係咪之前打官司花盡銀彈，所以而家要努力搵錢？志雲笑稱：「唔關事嘅，商業電台對我好好，好努力為我爭取合理價錢。我好享受工作，今日亦係正日生日(拍攝當天)好開心，細個就覺得生日要放一日假，o依家生日有工作好感恩 ，唔敢有任何要求，今年好特別生日，煩擾我事有完美句號，得到身邊朋友支持，我最需要人講一聲『你好嗎』、『我撐你』或拍一拍你膊頭時，呢啲說話唔好睇輕，係好重動力。」
日前志雲喺其中一集節目中，就講到無綫當年走寶冇簽甄子丹做旗下藝人
志雲喺節目中話:「其實TVB都曾經走寶嘅，曾經一位相熟嘅人託過我，問TVB有冇興趣邀請甄子丹，我相信呢個中間人可能都會問過甄子丹意思都未定，佢咁同我講啦，當時我都有同TVB管理層提過幾次，大家就嗰一刻就冇興趣去跟進，咁我就有啲可惜。
志雲講到無綫當年走寶冇簽甄子丹做旗下藝人
志雲指相信呢個中間人可能都會問過甄子丹意思都未定
對TVB嚟講又可惜，對甄子丹嚟講一啲都唔可惜，如果佢過咗檔之後，可能冇o依家做得咁好，所以有時乜嘢係得乜嘢係失，未到最後一刻都唔知，今時嘅失可能係將來嘅得，但今日嘅得可能係將來嘅失，所以千企唔好因為一得一失而令到自己唔開心。」講番當年中間人問無綫簽唔簽甄子丹，時間係90年代何定鈞做總經理、志雲就做節目部總監年代，當年甄子丹係亞視人，志雲強調當年唔知個中間人有冇問過甄子丹本人。
(蘋果日報)
