藝人陸永同太太Reina有兩個好可愛嘅囡囡Hannah同Simsim，佢哋兩個相當古靈精怪，不時都會製做出唔同嘅笑料，所以每次Reina分享兩個囡囡童言童語嘅時候，都可以成功呃like！
今日Reina就喺社交網站上載咗兩個囡囡同一班小朋友喺聖誕樹前面嘅合照，並笑言兩個囡囡係傻妹。事關Hannah同Simsim話屋企冇聖誕樹，所以驚今年冇聖誕禮物收，作為廿四孝爸爸嘅陸永一聽到囡囡咁樣講，即時就話要買聖誕樹氹兩個女。兩個囡囡就好開心，不過Reina就話好頭痕，仲話如果聖誕樹有得租就好，留言：「兩個傻𠵈（妹）之前擔心冇聖誕禮物，原因係今年我哋屋企冇聖誕樹，冇聖誕樹就唔會有禮物放喺度。聽完兩個女咁講，陸生話聽日點都要去買棵聖誕樹返嚟氹兩個女…有聖誕樹都可以冇聖誕禮物㗎喎！冇聖誕樹都可以有聖誕禮物啫，用完幾日又要搵地放收埋呢下先煩，如果有得租都幾好丫。」
睇吓阿囡幾興奮就知。
唔知收咗咩聖誕禮物呢？
屋企咁大，唔使驚放唔到聖誕樹啦。
（ON.CC）
