黃浩然前排同黎耀祥、蕭正楠再加多個曹永廉去咗布吉拍旅遊，雖然陳國邦因為幫奇妙同ViuTV拍劇而被飛，不過四個男人出去玩，依然有佢哋抵死嘅地方，好似黃浩然同蕭正楠成日對住曹永廉「寸寸貢」，但係轉個頭幾個麻甩佬又傾心事。
好似喺噚晚嗰集，佢哋幾個人又坐埋一齊邊食邊傾，講到旅行，浩然話為旅行呢個問題，以前同太太嘈過好多次交，因為嗰陣啱啱入TVB，唔敢去旅行，留喺香港等工作機會，不過有咗小朋友之後，想同佢哋去多啲地方，收到校曆表，即刻plan行程。
浩然話前年同佢哋滑雪，岳父笑住話佢係騾仔，因為浩然孭咗個大背囊，乜嘢都孭晒上身，嗰次浩然話想阿仔體驗生活，所以全程坐火車，呢個行程令佢哋感受良多。
浩然為咗屋企，做騾仔又有乜嘢問題呀？今日就有周刊報道，以前係工作狂嘅浩然，自從患上「貝賽特氏症」，佢嘅人生觀完全改變，識得喺工作同屋企人攞個平衡，唔再係以工作為先。因為太太KaKa本身做形象設計，需要周圍飛，變咗湊仔嘅工作由浩然主力承擔，佢除咗帶阿仔去旅行體驗生活之外，就算喺香港都會帶佢哋去郊遊，亦唔會谷佢哋嘅學業成績，反而希望可以等佢哋多啲嘗試。
報道仲話浩然呢個方法，成功令大仔Kayden入讀華仁小學，雖然升小一令Kayden有壓力，不過浩然同太太嘅協助，而且浩然仲親自接送，所以佢好快適應新生活。
(蘋果日報)
