柯震東今日被台灣周刊爆料指，話佢同拍拖3年嘅李毓芬分手，而柯震東接受台灣《蘋果》訪問時，直認不諱，承認同李毓芬三年情玩完，但就唔肯講分手原因。
台灣周刊報道，指柯震東被拍到十指緊扣南韓超模Irene，仲開香檳同歡，搞得正印女友李毓芬相當尷尬。事後柯震東對外強調「沒事啊」、「好好的」。報道指，李毓芬同柯震東因此事而鬧咗一場大交，搞到李毓芬要嗌分手，女方以為只係嚇吓男友，點知柯震東「秒速答應」，就係咁佢哋就分手喇！
報道入面仲講到李毓芬嘅朋友向周刊透露，李毓芬雖然陪伴柯震東走過當年嘅吸毒後低潮期，仲不時出席柯家家宴，看似地位穩固，但其實柯震東極愛玩嘅性格同龐大交友圈，至今仍讓李毓芬無法適應，缺乏安全感。
而台灣《蘋果》問到柯震東係咪同李毓芬分手一事，佢就打破沉默，承認同李毓芬分手，至於分手原因，佢就未有詳細透露，就讓女方嘅友人去說。
(蘋果日報)
