黎耀祥、曹永廉、蕭正楠及黃浩然拍攝的特輯《公公出埠》昨晚播映第二集，第一集中，四位型男互相送禮物、大談合作點滴，搞出不少火花，原來第二集中，曹永廉一度發火，指蕭正楠與浩然兩個夾擊他，佢講一句，佢兩個就頂三句，向來佢哋都係你單打我，我單打你，不過原來今次真係玩出真火，向來玩得嘅阿廉都扯火。
曹永廉接受東網訪問時謂:「我真係嬲㗎！嗰日我病緊，感冒到聲都轉埋，都病得幾犀利，第一日到埗佢兩個不停咁窒我，窒到我火都嚟埋，我都唔理喇！部機仲Roll緊，我就鬧，我就發脾氣！」
阿廉指之後兩個都唔識死，仲繼續窒，他說:「去到夜晚兩個都有同我傾番，又話唔好意思，算啦！兄弟點有隔夜仇呀！不過第二日佢哋又係咁，呢兩條契弟把口都唔收！佢哋係唔係都窒，都唔攰嘅！咁我不如唔好講啦！我真係發脾氣。」
問到平日甚玩得的他，突然咁躁，是否更年期時，阿廉即笑謂:「過咗更年期啦！之前去泰國拍嘢嗰陣咪更年期囉！依家過咗！」果然不失阿廉的搞笑本色。
(on.cc東網)
