今年43歲的馬國明與年輕15載，28歲的無綫花旦黃心穎相戀一年多，兩人每次被傳媒追問戀情時，亦不時隔空打情罵俏，就連最近馬國明憑《降魔的》提名《萬千星輝頒獎典禮2017》視帝，身為女友的心穎亦落力為男友拉票，但一直有傳女方家人指兩人年紀有距離，應要作長時間了解，難怪兩人拍拖至今，雙方仍未見家長。
而戀情受壓的馬國明近日雖然未有新劇在身，但見他卻未有約會女友拍拖，反而一星期內往銅鑼灣做足三次Facial，實行執定靚樣，減齡「回春」箍心穎。
馬國明於昨日下午約三時又出動往做Facial，離開寓所時被問到最近與心穎甚少見面，他說:「唔講咁多啫，無謂講咁多，一路都係了解中，如果有公布，就可能係結婚或者咩囉（意指分手）。我哋唔想食咗咩飯、睇咗咩戲，都要交代得咁Detail，係兩個人嘅事。（點形容同心穎嘅關係？）幾好呀！幾好！（係咪男女朋友？）了解中啦！未一齊之前都一直係了解中啦！（依家係咪去搵心穎？）唔係呀，我依家去做Facial呀！」
之後他便步往取車，途中更被女街坊拉着合照，馬國明之後驅車往銅鑼灣扮靚，其間更不停撳電話，看來是向女友報告。
至於黃心穎接受東網訪問時，似乎與男友夾定口供，她說:「我哋感情冇變，正如馬國明所講，拍拖唔一定要畀人影到嘅，我哋了解中，佢又忙拍戲，我又忙拍劇同排舞，大家各有各忙，我哋有Keep住聯絡。（有冇人斟你哋情侶檔演出？）有呀，我哋倒數會同場。」提到馬國明有時間去做Facial都未有約會她，心穎笑言:「我冇時間做Facial喎。」
(on.cc東網)
