藝人陳敏之、陳華鑫與林秀怡到葵興為劇集《性在有情》宣傳，三女以聖誕Look在波波池大玩遊戲。敏之笑言見波波池即諗起日前囝囝雷子樂的生日會：「當日都有波波池，成班小朋友、大人都有落去玩，好童真。子樂食完奶就瞓咗陣，好快又起身同大家玩。做咗媽咪後好多家庭聚會，真係攰過拍劇！（周家蔚都有嚟？）係呀，佢帶咗兩個仔嚟，胡杏兒都有嚟但冇帶BB。（家蔚心情OK?）佢好開心喎，冇嘢。」敏之又表示聖誕節會帶子樂去睇燈飾，感受香港人的聖誕節。
講到昨日《溏心風暴3》中播出敏之與唐文龍的激情床戲，敏之笑說：「尋晚老公冇睇，我同媽咪睇嘅，反而仲尷尬，用棉被去包住自己，點知媽咪睇完講咗句你實畀老爺奶奶罵！咁佢哋好開通，唔會罵我嘅。（怕唔怕老公重溫？）唔知，佢未必，但我想佢避一避啦，始終係老公！我又唔會迫佢睇。」
講到敏之在兩套劇分別床戰張兆輝與唐文龍，她笑言冇法比較兩位對手：「好唔同，《性在有情》係搞笑，《溏心》係Heavy啲！都有朋友反應鍾意睇《溏心》，話近年少有呢啲刺激感情線，咁我自己都鍾意。（唔受限奶令影響？）因為係需要呢啲情節、都有分手同鬧交，唔係衣着上嘅性感，今次係最大膽一次、亦係最痛心嘅一次演出，當時剛剛生完係開心媽媽，都怕因為角色被拖入低潮，因為角色都多內心戲同好爆發，但返到屋企見到BB開心晒，BB幫咗我好多！（子樂認得電視機裏面嘅媽咪？）認得，好多時見到海報都會嗌mama，佢知媽媽係演戲嘅，大個啲就可能會打文龍，話佢蝦媽咪！自己都好期待，覺得咁樣好sweet！（有同老公預告性感？）冇講太多，因為會影響工作，自己都會多顧忌，加上佢都叫我畀心機，會同我事後檢討多。」
(on.cc東網)
