歌手衛蘭（Janice）到電台宣傳明年一月的紅館演唱會，問到現時是否已籌備得七七八八？她坦言：「未啊，都有少少囉囉攣，因為通常演唱會都係音樂部份搞咗先，但今次係相反，即係舞台、服裝嗰啲搞咗先，尋日就開始排舞，但因為呢排要出席頒奬禮，所以都冇乜時間排。」
問到可會有嘉賓？她表示：「會有呀，但未肯定，有個未知請唔請到。」
她又表示今次唔會特登減肥：「對上一次演唱會特登減十磅，但我好唔enjoy，當時一邊跑步一邊喊，所以我今次就同自己講唔可以減得咁唔健康，要Balance番。」問到歌衫可會性感，可擔心到時上到台會有些負面聲音？她笑言：「唧出嚟？所以企上台係要有勇氣。（啲衫會唔會密實遮住？）會帶出最靚嘅地方，可能就係條頸。」
另外，講到頒獎禮，她表示會出席其中三個，講到有指她將會首次奪得叱咤女歌手金奬，她則話：「我覺得唔會囉，有得參加同入五強已經好開心，順其自然，攞唔到唔緊要，等下次再努力啲。（咁肯定冇得攞？）我覺得一定唔會囉，唔知呀。（但容祖兒、李克勤都睇好你攞女歌手奬？）
有佢哋咁樣睇起我已經好足夠，好似攞咗獎咁，好感恩。」問到睇好哪位女歌手？她想了一會兒，只謂：「好多呀，個個都係嗰個質素，可能容祖兒啦，讚番佢。（但佢唔去。）係咩？唔知呀。」
(東方日報)
