女星賈曉晨（JJ）喺上月為老公樊少皇誕下囡囡「小飯兜」，榮升人母嘅佢都難掩做媽媽嘅喜悅，不時喺網上表示學習點照顧囡囡。不過話咁快囡囡就滿月喇，愛錫囡囡嘅JJ同老公樊少皇就為囡囡舉行咗個滿月派對，並留言：「今天小飯兜滿月了，希望寶貝你健康、平安、快樂。」JJ不忘感激月子中心幫小飯兜安排Party，將佢哋照顧得咁好添！
相中見到派對以動物為主題，場內又有唔同嘅氣球、裝飾布置，仲有一個寫上「飯兜 滿月快樂」字牌蛋糕，認真有心思！
而戴上粉紅色頭箍嘅「小飯兜」，喺樊少皇嘅懷抱上，一家三口合照，見到樊少皇望住囡囡深情嘅眼神作狀錫囡囡，大晒父愛，相當冧豬，一睇就知道囡囡係佢嘅掌上明珠啦！
唔少網民都留言祝福，希望「小飯兜」健康成長。
(on.cc東網)
