名模熊黛林（Lynn）晚上到九龍灣出席電影首映，今次是她宣布懷孕後首次出席公開活動，懷孕五個月的她明顯凸肚，仍身穿四吋紅色高踭鞋，非常貪靚，出場時要工作人員扶實。
問到穿高踭鞋有否告知老公郭可頌？Lynn說：「冇畀佢睇呀！經理人都建議我着平底鞋，但我覺得唔靚，自己都慣咗高踭，個幾鐘冇事嘅！（唔怕老公鬧？）唔會，我平時都好乖，係工作要靚啲。」
Lynn又指老公近期相當緊張，盡量不讓她外出，問到有否向姑奶郭可盈請教兩招？她說：「一家人食飯都有講起，佢會教我小心啲咩，食咩好。（戒口難唔難？）還好啦！奶奶平時煮嘢都清淡，係我間中想食麻辣，仲有食麻辣火鍋，但對我嚟講唔算辣，最近仲轉口味多咗食甜嘢。」
Lynn又表示懷孕初期身體不適嘔足三個月：「日日攬住個廁所喺度嘔，本身身體差，所以反應大啲，仲有成個月冇乜同老公講嘢，真係唔好意思咁冷淡，佢都明白，又幫我唔到好心痛。（奶奶有冇煲補品？）都有，日日有湯飲。（知道仔定女未？）知道，但唔講住。（訂咗床位未？）老公負責，但會喺香港生。（預產期幾時？）唔講啦！（開刀定順產？）到時再講啦！（改咗名未？）未諗呀！（老公有冇咩獎勵？）生咗先啦！我最想要健康嘅BB。（想繼續生？）希望多啲，但生兩個先。（要生到有仔為止？）睇下點，冇咩所謂。」對於郭富城之前向Lynn送祝福，Lynn說：「係咩？多謝！」
訪問後，Lynn一度見暈，要工作人員扶她到後台休息，其後她再度出場照常上台大合照，之後坐下供電子傳媒訪問。
(on.cc東網)
