關心妍今晚喺九展舉行「重新站起來」慈善晚宴，筵開60席，身為創辦人嘅佢為求盡善盡美，所以同老公楊長智乜都親力親為。苟芸慧同男友陸漢洋、陸詩韻、許廷鏗等都有出席支持。
關心妍見到晚宴咁成功，佢接受傳媒訪問時都感動落淚，佢話：「心情好難形容，每樣嘢都好感動，幫人係要犧牲，比做演唱會更難，我未試過做一件事辛苦得嚟咁有價值，幫到抑鬱症嘅人。」
關心妍話呢次活動花咗兩、三個月時間籌備，佢話：「本住幫到幾多就幾多，我放低歌手同媽媽身份，希望亦幫到年青人，藝人嘅光應係咁散發出去。我亦好多謝鄧萃雯嚟分享，許廷鏗義演同買枱，出錢出力，碌咗好多人情，60圍賣晒，希望香港多啲愛。」
關心妍大爆老公好幫手，咕喱都肯做：「辛苦佢，屋企人、朋友都放低身份嚟支持，善款會捐畀兩間機構。」關心妍今晚就怕分身乏術，所以冇帶囡囡嚟，佢話：「我同囡囡講咗媽咪去籌錢，佢有應我，唔知佢明唔明，等佢大啲先再參加。」
(蘋果日報)
