索媽陳敏之個寶貝仔雷子樂（又名雷冬至）過幾日1歲生日，昨日敏之為囝囝搞party提早慶祝，連呢幾日成為新聞人物嘅周家蔚姨姨都特登化個靚妝出門參加。
周家蔚姨姨人影未見，不過有另一位auntie胡杏兒就率先po相，佢同敏之兩面夾攻錫錫超可愛壽星仔雷冬至，不過主角就唔知被啲咩嘢吸引咗視線，好似有啲心不在焉。
胡杏兒句祝福好簡單直接：「子樂，Happy 1st Birthday!!」
至於敏之當然都有po吓啲現場實況，淨係蛋糕都最少兩個，幾層高嗰種，現場有唔少寫住CHI LOK嘅佈置，另外，敏之又請咗專門人員返嚟表演娛賓，吸引到大人細路來賓嘅視線，不過主角雷冬至小朋友呢，就喺外傭姐姐臂彎入面接近瞓着狀態，可能真係攰喇……
另外，雖然胡杏兒冇帶埋囝囝出席生日派對，但老公李乘德就喺社交網晒出囝囝啜手指嘅得意相，仲用英文留言，意指：「佢依家終於識得點樣啜手指，當我哋食緊飯嘅時候，突然聽到佢啜手指嘅聲音，真係好可愛，但唔希望成為習慣。」
(蘋果日報)
