陳真同梁浸浸今日約埋一齊去咗澳門玩喎！當然同行嘅仲有佢哋嘅爸爸、媽媽黃依汶(Emme)同陳國坤，與及鄭希怡(Yumiko)同梁學儲啦。
今日Emme同Yumiko兩家人，一齊去澳門為好友杜芷筠(Veronica)嘅花店剪綵，佢哋現身花店時，就引來大批市民圍觀，迫到出晒馬路，要出動警察到場維持秩序，場面墟冚。剪綵儀式後，當然有舞龍舞獅啦，而陳真就被醒獅儀式吸引住，走咗去獅頭前細看，身為爸爸嘅陳國坤就好細心咁向囝囝解釋，一臉慈父樣，真係好溫馨。Emme話，今次難得同老公一齊嚟澳門剪綵，又唔想將囝囝留喺屋企，所以就帶埋佢嚟，咁啱Yumiko又帶咗梁浸浸嚟，咁就可以同陳真做伴喇，Emme仲話佢哋兩家人已經約好新年會一齊去睇雪。問到陳國坤有冇經常送花俾老婆？Emme即搶答：「佢以前就試過採花畀我，o依家就好方便，一個電話就OK啦。」佢又承認老公個性浪漫，過時過節一定會送花。陳國坤又透露放完假後，就會着手籌備「反黑2」的拍攝工作，新一季嘅演員陣容更強勁，連從未演過劇集嘅巨星亦會加盟。Yumiko就話囡囡私底下都經常同陳真見面，佢哋今次一見面就好鬼癡纏，Yumiko仲大爆佢哋分開坐保母時，一個不停問「弟弟」，一個就問「姐姐」，佢笑話：「我覺得佢哋就好似羅密歐與茱麗麗咁，好鬼搞笑。」佢又大讚陳真有家底，父母又好相與，真係唔介意兩家親上加親，成為襯家。此外，最近一歲嘅小予恩手術後可能變植物人，作為媽媽嘅Yumiko深深感受到佢家人有幾憂心，希望大家祝福小予恩，令佢可以渡過難關，佢話囡囡剛出世時亦曾一度要住院，當時佢都擔心到寧願自己可以代替，佢話：「相信只有做咗媽媽嘅人先可以體會到。」
Yumiko話唔介意同黃依汶對襯家。
陳真同梁浸浸真係好癡纏㗎，去到邊都一齊。
你睇佢哋幾sweet！
陳國坤好細心咁同囝囝講解舞獅。
兩個潮媽齊到澳門出席活動。
黃依汶同老公陳國坤
(Apple Daily)
