2017年仲有半個月就完結，喺踏入新一年之前，仲有喜訊！就係前新聞小花蔡雪瑩（Snowy）又陀B喇！恭喜晒！
現年30歲嘅Snowy，當年有「至索主播」之稱，去年4月嫁俾全國政協朱銘泉兒子、上市公司太子爺朱威霖（William）正式封盤，同年8月，身邊仲多咗一個「生命最重要男人」，就係生咗囝囝Wesley。
其實生完無耐，Snowy已經話想追多個，等囝囝唔駛咁悶，《蘋果》就收到消息，原來佢又陀緊小baby三個月。
Snowy噚日接受《蘋果》訪問，親證懷孕一事，佢話：「係呀！係有咗呀！係有計劃嘅，本來諗住隔兩、三年，但囝囝開始大，佢喺公園都想同小朋友玩，見到小朋友喊佢又會去錫，又當啲玩具係朋友去錫，開始覺得佢好悶，始終大人同小朋友玩唔同。」
Snowy又話o依家3個幾月，生仔生女都開心，都陀得舒服，無嘔：「今次同上次唔同，上次陀B好鍾意食鹹同辣，o依家成日想飲酸甜嘢，日日要飲檸檬茶，之前飲紙包，o依家都唔敢，所以飲都唔加糖。」
自爆陀B餵口好大嘅Snowy，佢話上次都重咗50幾磅，3個幾月已經重10磅，今次就重咗3磅、4磅，但佢話重都無所謂，有信心修到身，最緊要BB肥肥白白、健康出世。
問佢有冇同囝囝Wesley「報定案」？Snowy話：「有呀！同佢講可能會有細佬或者妹妹，但佢得15個月，應該唔係好明白，但就學咗講哥哥，問佢邊個係哥哥，佢會識舉手。」Snowy仲話好多朋友教路，例如代小BB買禮物送俾佢，然後話係小BB送，等囝囝對BB第一印象好啲。
(蘋果日報)
