入行30年，喺97年回歸無綫嘅黃德斌，上個月正式離開呢個合作咗20年嘅地方，出去闖一番事業。不過呢個消息似乎一啲都唔意外，其實早喺十月中，已經有網民留言話德斌將會離巢，無綫又少咗一個好戲之人，甚至話少咗個猛將！
日前德斌喺尖沙嘴接受《蘋果》訪問，講到網民話嘅留言，德斌就話：「我唔會咁諗，佢哋有大把人材，少咗一個公司又唔會話有乜嘢大影響，可能係一啲睇慣咗嘅觀眾，不過真係好多謝佢哋，對我嚟講係一種鼓勵，我又唔係唔會拍，可能將來有機會再合作。」
但係話晒喺一間公司做咗20年，要離開唔係一件容易嘅事，佢都話：「係㗎，嗰陣點都有啲掙扎，但係又係嗰句，老土啲，天下無不散之筵席，再加上o依家嘅環境已經唔同咗，我相信有多咗合作機會，唔會話走咗就係走咗。」唔知回復自由身，吸咗嗰啖自由嘅空氣嘅感覺又係點呢？德斌話：「好舒服，係positive，其實係自己想要嗰種自由，嗰啖空氣係想咗好耐，o依家有好多嘢傾緊，有啲係意想不到。」
唔知有冇覺得遲咗？德斌就話：「冇話遲或者早，呢啲嘢自己隨心喇，想出去咪出去。o依家覺得係時候做多啲唔同嘅嘢，試多啲唔同嘅路，同多啲唔同嘅人合作。」佢仲話：「其實做咗咁多年，有啲乜嘢角色係未做過？拍過電影，又做過舞台劇，喺呢幾年我都喺出面做嘢多，公司嘅工作反而唔多，出面嘅世界真係好大，電視城係一個小世界，我咪趁住呢個機會，出去開吓眼界。」
德斌仲話嚟緊會喺上海做舞台劇，明年可能有機會去澳洲、加拿大演出，o依家仲喺度傾緊。近年韓劇攻佔咗中、港兩地市場，小鮮肉固然吸引，但係大叔亦都有一定嘅叫座力，唔知呢方面又有冇加強德斌嘅信心？佢就話：「唔關事，不嬲都係咁，有份量嗰啲演員，其實好多都好有資歷，你睇吓嗰啲經典台，做得嘅人唔係個個都係年青貌美，既然我都仲做得，點解唔出去試吓？」
出得嚟行，風險一定會有，德斌笑笑口話：「對我嚟講，入呢行已經係好冒險，自己又照吓鏡，點解你又會喺度嘅？唔爭在試多次。做人一定要有冒險精神，我以前都過做過好多冒險嘢，好似去沙漠跑步，又走去喜馬拉亞山，連唔識唱歌都走去唱，如果你唔去做，又點會知道自己得唔得？點解唔出去試吓？有時做人諗嘢又唔使咁複雜，可能去返後生嘅想法，唔好諗咁多，想做就去做，反正將來係未知之數，諗咁多都冇用，做唔到又唔使死，香港地只要你肯做就得。」
總結喺無線呢20年嘅生活，德斌話：「多謝晒，始終佢係幫咗我好多，嗰陣由路人甲乙開始，再做到o依家，好想講多謝一啲俾過工作我嘅人，係佢哋俾咗好多磨練，咁先可以今日嘅黃德斌。」
(蘋果日報)
