歌手關心妍（Jade）為12月16日舉行的慈善晚宴宣傳，她坦言活動很有意義，就算暫時放下女兒都要支持。對於有不少歌迷想知她何時再唱歌，她表示起碼要等女兒入讀學前班：「佢依家返學時間比較少，我要陪佢嘅時間比較多。（粉絲多數同你喺網上溝通？）係呀，我會上載我嘅近況，但有時好忙，唔記得上載就瞓咗，冇諗過做媽媽可以佔自己所有時間，但我都會盡量睇晒粉絲嘅留言。」Jade笑言要躲起來用手機，平時都在洗手間或廚房回覆留言：「我暫時唔想囡囡接觸手機，都冇畀佢睇電視，盡量畀佢睇書，出街就攞嘢食氹佢，令佢專注力好啲。佢唔覺得手機好好玩，但我同老公講電話，佢就會扮我，但唔知我做乜，好得意。」
Jade坦言見到女兒就開心，就算見到對方流鼻涕都一樣開心：「我個人融咗咁。（怕唔怕污糟？）唔怕，因為我有養狗仔，習慣咗處理啲大小二便，已經嚇我唔到，處理鼻涕我都覺得輕而易舉。」她認為耐性才是最大考驗，自言有時耐性不足，要從女兒身上學習：「原來啖氣可以忍住，係好大啟發。（咩事會令你忍唔住？）氹佢瞓覺，有時佢玩得好癲，夜晚就瞓唔到，會喊。我要擺佢上床，又擺番落嚟，可能10次。有一次以為得，點知佢又醒番，嗰吓個心真係着火，但表面仲係好冷靜。」她覺得媽媽的能耐可以去到無限遠，平時對家人或朋友就未必有這份耐性。
一家其實好幸福！
(ON.CC)
