【但就唔見…】喬妹婚後首公開露面

韓國女星宋慧喬於10月31號與神劇《太陽的後裔》拍檔宋仲基舉行世紀婚禮，婚後喬妹未有公開露面過，只係上周六孖老公現身「國民妹妹」IU嘅演唱會時被網民影到，不過喬妹今日終於公開蒲頭！

喬妹今日被影到現身首爾仁川國際機場，喬妹未有一如以往咁包到冚，僅身穿大褸兼以口罩遮樣，素顏現身，而手上嘅婚戒亦相當搶鏡，不過就唔見老公宋仲基嘅身影。

據知喬妹係飛到北京出席活動，隨後其所屬事務所表示喬妹是次到大陸出席三日兩夜嘅行程，但未有透露詳細內容。

(蘋果日報)