踏入12月，好多公司都會趁機開吓P，同日前太陽娛樂文化就假九展舉行聖誕P，更以「殺手之夜」為主題，公司上下都要扮嘢出席，老闆周焯華（洗米華）、唐才智及董事總經理黃柏高當然有出席，而旗下藝人許志安、薛凱琪、劉浩龍（師兄）、沈震軒、Kevin Boy（KB）等亦拉隊到場。
講到佢哋啲造型，師兄攬住個盆栽扮《這個殺手不太冷》嘅Leon、沈震軒就扮化身《殺神John Wick》主角John Wick，但佢哋都不及一向玩得好盡嘅KB，佢以《德洲電鋸殺人狂》扮相現身，而KB亦順理成章贏得最佳造型獎季軍。
現場設有現金大抽獎，其中曾國祥中獎，佢不單只攞番中獎嗰10,000蚊出嚟再抽，更自掏腰包、攞多10,000出嚟加碼。
至於獲邀成為座上客嘅林家棟，除咗自掏40,000蚊出嚟之外，更落足嘴頭眾籌，合共籌到50萬元，令在場人場皆大歡喜！喺啲咁開心嘅日子，又點少得老闆娘「洗米嫂」陳慧玲（Heidi）？
雖然洗米嫂好低調咁冇現身大合照，但喺佢Instagram就搵到佢張「女殺手」相，幾有型㗎！但更吸睛嘅係，佢攬實林家棟影嗰張合照，唔知周老闆睇完有咩感想呢？
（蘋果日報）
