鄭萃雯（Karen）日前帶同快將2歲嘅孖仔、哥哥卓言及弟弟卓喬接受《蘋果》訪問，一對孖B超似樣，但性格各有不同，弟弟性格明顯較活躍，Karen話轉工後最開心係多咗親子時間，小朋友亦比以前乖。
然而，Karen承認，決定辭去主播一職確有不捨，但為咗家庭及小朋友都要作出選擇，「以前公司都好好，話就我時間，但我覺得對其他同事唔公平，人人都有家人，以前我成日要將小朋友放喺媽咪屋企，會好多嘢擔心，又驚佢哋冇新鮮母乳，佢哋又有濕疹，怕佢哋狂抓，又怕媽咪半夜要照顧會好辛苦。」
問到Karen生孖B有冇打亂計劃？她即笑言：「都有呀！本來都想有2個，老公仲話3、4個，但o依家生咗孖要封肚喇！」
Karen透露，老公家族都有孖胎紀錄，但一直未有為意，做產檢時都嚇咗一跳，佢更形容生B後首3個月係人生最黑暗嘅日子：「好地獄㗎，小朋友兩個鐘飲一次奶，每次循環咁做，得半個鐘休息，好似癲婆咁，冇一份工比阿媽辛苦，所以奉勸想生孖嘅要諗清楚。」
講到新工作，Karen即眉飛色舞，更認為轉工係緣份，新老闆都係以前做記者負責醫療新聞時認識嘅人：「離開大台後，醫療界朋友都問我有冇興趣喺一個平台講下醫療知識，用一個新嘅模式去等人接觸多啲，所以o依家去咗一間醫療公關度做，主要做啲拍片同production工作，都幾得意。」
Karen表示，她已經開咗facebook專頁，現時着手聯絡一啲醫生，希望可以邀請佢哋講關於唔同疾病嘅資訊。
(蘋果日報)
