歌手古巨基出席《英皇電競菁英盃 WE ARE THE FUTURE》記者會，他表示自己是元祖級機迷，由卡片機開始每代遊戲機都有打，入行後玩一個可以網上連線的足球遊戲，更試過取得世界排名第八位。
他亦表示試過不沖涼不洗頭，打完機就睡覺，瞓醒又再打機的生活，問到試過幾多日這樣的生活？他謂：「都有三至四日，有幾日唔使做嘢，嗰陣衝緊排名。」問到古太可有鬧到他反艇？他表示：「我依家雖然冇以前打得咁癲，但都有打手機遊戲，佢就會叫我快啲瞓覺。（有冇沒收你部機？）冇，邊沒收得到。（叫得停你？）要拖拖拉拉好耐。」
古巨基o依家都會打手機遊戲，佢話老婆冇佢咁好氣：「太太嘅朋友圈子大家會傾偈，話我打機好過出去蒲，起碼喺屋企可以睇到，好過去滾啦！咁我又唔係不良嗜好，只係仲有一份童心。」他亦表示想不到打機可以發展成電競運動，問到可想向這方面發展？他笑言：「真係好想，覺得好熱血，但依家先加入佢哋玩嘅game就蝕底，大家已經行到好遠，我就旁邊支持好啲。」
講到工作，他表示做緊新大碟，亦有到外地做巡演，剛拍完一套微電影，亦準備緊一套自編自導的電影：「依家一齊傾緊劇本。（會演埋？）要度埋劇本先知，因為要睇吓搞唔搞得掂。（幾時成事？）未有咁快，依家仲度緊劇本。（你可以揀埋女主角？）係，不過呢套係勵志片，男仔為主。」
講到聖誕節，他表示會到外地工作，問到可會趁機造人？他點頭表示：「加油。」他又表示在後台見到一個BB囡很可愛，問到可會想生女？他謂：「仔女冇所謂，係自己嘅已經好開心。」
(on.cc東網)
