藝人賴慰玲日前誕下6.6磅男B，現於家中坐月，今接受周刊訪問，講番日前生仔的「戰況」，原本想順產的她，因距離穿羊水時間太長，最終要剖腹生Ｂ，她謂：「BB係喺預產期出世，當時係穿羊水入院嘅，嗰陣都未開始痛，我仲買啲生果、零食，諗住享受埋（卸貨前）最後嘅時光，點知陣痛就愈嚟愈勁，痛到都食唔到嘢，痛到我大叫原來生仔係咁痛嘅，但我覺得自己都頂得住，但一頂都頂咗36個鐘，因為生B距離穿水唔可以太耐，所以最後都決定開刀。」
賴慰玲一向人緣甚佳，生B之後，當然一大班好朋友嚟探望，其中仲蔡思貝、吳嘉熙更爭住幫BB換屎片，賴慰玲謂：「Sisley（蔡思貝）、Cherona（吳嘉熙）嚟到，見到BB有便便，即刻好興奮爭住換片，但佢哋都雞手鴨腳，反而有經驗嘅阿雪（孫慧雪）就無出手，我同佢一齊睇到一額汗，但呢個情景，亦即係BB一出世就有好多契爺契媽爭住錫佢，佢哋因為我而覺得好開心，我都好開心，當然，我老公全程陪住我，亦勝過一切！（對BB有乜嘢期望？）當然係健康，同埋我已經患咗我BB最可愛症㗎喇，呢家對BB目不轉睛。」
(東方日報 / 蘋果日報)
