「菲律賓公主」陳昭昭大婚，今日同拍拖兩年半嘅男友李志豪(Franky)拉埋天窗，晚上一對新人喺何文田擺酒，陳昭昭身穿谷胸拖尾白色婚紗同老公恩愛現身，傳媒要求佢哋咀嘴，昭昭怕醜避開，老公只係錫到佢塊面，姐妹團有前亞姐王瑋、梁焯滿、仙樂都、林雅詩。
一對新人接受訪問，昭昭被問到今日有冇感動事件？佢話：「今日早上行教堂，宣布承認佢係我丈夫，病與苦患難都會一齊時，自己把聲都震震哋，見到老公有啲淚光，自己忍得到冇喊，因為知道喊就爆喊收唔到。」
問到老公對你有乜承諾？李志豪發表愛的宣言：「一生一世愛佢同照顧佢。」昭昭話現場佈置好似上帝花園，因為兩夫婦都經歷一啲嘢先喺埋一齊，都有啲起伏，希望婚姻係一生一世。問到今早接新娘有冇為難老公？李志豪表示：「都係做吓運動跳吓草裙舞扭吓腰，呢班姐妹都算好溫柔。」
問昭昭婚後係咪做少奶奶？李志豪搶答：「我會盡一切能力，令到太太做少奶奶。」昭昭就話：「自己都希望工作，因為仲有公職在身，老公啱啱追我時，就話可以請六個工人照顧我，因為佢係印尼人，當時就咁講。」問到o依家兌現未？有冇三個工人？昭昭笑笑話：「o依家係冇嘅。」而會唔會生B就順其自然。
至於身為「昭昭公主」嘅尊貴身份，問到有冇向棉蘭老島報喜？昭昭話：「有報喜，不過嚟唔切喺嗰邊搞慶祝儀式，因為冇時間，連度蜜月都要押後。」駙馬李志豪就話：「計劃去歐洲度蜜月。」問到駙馬嘅職業？昭昭公主代答：「老公喺印尼做生意。」之前有報道話係做中港司機，昭昭緊張解釋：「一直都唔知點解有咁嘅說法。」李志豪就親自解答：「經營海產生意，賣海參嗰類嘢。」
(蘋果日報)
