阿嬌鍾欣潼以貼身deep V背露連身裙性感現身「Yahoo搜尋人氣大獎2017」頒獎禮，佢獲得「人氣廣告代言」。
問到今日性感造型男友有冇詐型，阿嬌就話：「都唔知你講咩，當然啦佢都覺得性感，都唔想我太性感，又覺得俾人睇蝕咁。」咁會唔會聽佢講呢？佢就話：「唔得我都要做嘢，冇辦法。」今年聖誕節係第一年同男友Micheal過，不過阿嬌就話要喺工作中渡過：「我都要做嘢，但想同佢佈置聖誕樹，我都有十幾年冇佈置聖誕樹。」至於係邊個屋企就未知咁話。聖誕節要工作點陪男友呢？阿嬌話：「佢會就我，不過都幾肯定，佢會孤獨咁過。」記者提議叫Micheal扮聖誕老人探班，阿嬌即刻話：「唔好，千祈唔好，最怕cosplay，即刻減十分。」咁禮物又準備好未呢？佢好坦白咁話未諗。咁又會唔會煮聖誕節大餐？佢話：「好耐冇煮，驚煮得好慢。」講到前拍檔余文樂結婚，阿嬌話：「唔知喎，恭喜晒！好少聯絡，不過見到都會恭喜佢。」
阿嬌自爆原來好怕人玩Cosplay。
仲話男友如果趁聖誕節扮聖誕老人就要減10分。
聖誕節撞啱要去上海工作，阿嬌話男友應該會就佢喺上海見面。
阿嬌男友賴弘國
(蘋果日報)
