吳國敬同美甲店老闆娘Elaine拍拖11年，阿敬求婚兩次被拒，佢有意再接再厲，適當時間再「突擊」，Elaine淡定等嫁。阿敬同Elaine日前帶着7歲愛犬金金到西貢拍拖。
阿敬話06年開始同Elaine拍拖，三年後第一次求婚即食檸檬，「嗰晚成班朋友飲酒，我興之所致求婚，點知佢拒絕，第一次求婚被拒好sad㗎。」Elaine話：「No咪no囉，我嗰刻突然覺好奇怪，都唔知點解，佢第二次求婚，我又係say no。」
阿敬已計劃密謀第三次求婚：「差唔多㗎喇，保持神秘先，我好多步驟要準備，首要買定粒10卡鑽戒。」阿敬仲承諾當Elaine出嫁時，要將佢變成「土豪新娘」：「佢夢想婚禮係要成身龍鳳鈪喎，我問佢要幾多對？係我就同親友『吹雞』，起碼都幾十對。」
兩人拍拖後同居，已有老夫老妻感覺，即使未簽婚書，但街坊朋友都視Elaine為阿敬另一半：「通街啲人都叫我吳太，所以結唔結冇咩分別，第一次畀人叫吳太，我冇應冇望，叫吳太老得滯，嗌敬嫂會多啲。」
阿敬得戚：「佢都走唔甩，我落咗藥，落咗降頭呀。」阿敬大讚Elaine有三個優點：「食得、瞓得、捱得。我哋兩個都享受食嘢，食肥咗又一齊減肥。」
Elaine又覺阿敬有乜嘢優點？佢衝口而出：「我諗唔到，我諗有人同我打交鬧交。」打者愛也，烈女性格嘅Elaine表露無遺。Elaine好奇問阿敬係咪有七年之癢，甚至11年之癢？阿敬搞笑話：「生癬咩，咪搽吓佢。」
Elaine詐型阿敬未達標做二十四孝老公，阿敬搶答：「我梗係算係啦。」Elaine反寸：「你指標太低。」阿敬駁嘴：「佢條眼線就高，事業線就好，如果我對佢唔好，佢走咗好耐啦。」
Elaine又投訴阿敬常發脾氣，阿敬神回：「o依家我純過金金。」52歲嘅阿敬有生育計劃，佢希望到時雙喜臨門：「生B就實結，適當時候生啦。」Elaine答應話如果阿敬練得結實肌肉，佢就肯講「I Do」。阿敬，加油啊！
(蘋果日報)
