33歲嘅《東張西望》靚主持梁麗翹（Nicole），今年二月同圈外男友結婚，今晚佢喺社交網出post宣
佈：造人成功！
Nicole仲相約一班好友開P，宣佈喜訊。依家Nicole懷孕四個月。晚上佢又喺FB貼咗條片，片中主角係佢媽咪，內容係Nicole送咗件印住「GrandMa is my name.Spoiling is my game」嘅衫送俾媽媽，梁媽媽好開心咁拎住件衫舞嚟舞去，諗到好長遠長遠到計劃減肥嚟著呢件衫。
Nicole一直忍住笑，問阿媽明唔明件衫係咩意思，梁媽媽當堂俾佢拋窒，就話：「字面我知點，咁有乜嘢深層意義？」於是Nicole拎張超聲波相俾佢睇，梁媽媽呆咗半秒，驚訝問：「吓？真0架？」真情流露。
晚上Nicole接受傳媒訪問，講到o依家陀B情況，佢話：「呢幾個月都有唔舒服，不過好開心，點都值得嘅，老公好照顧我呀，佢已經睇定啲書去照顧大肚坐月嘅我，仲睇埋育兒書。」
Nicole仲話預產期係明年五月，暫時希望順產，除非醫生建議開刀。之後又問到BB嘅性別，見佢ig啲相，嗰啲BB仔嘢都好中性，Nicole就話：「因為嗰時冇人知係仔定女，所以佢哋兩樣都準備晒俾我，我諗住等其他朋友估下仔定女，遲啲再開估，不過莊思敏兩姊妹已經輸咗餐飯俾我，因為佢哋估錯咗。」
至於工作方面，Nicole話：「我會繼續做嘢，監製對我好好，辛苦嘅外景都唔會派我去，主要做廠主持。」
(蘋果日報)
