去年余文樂同大自己11年嘅阮小儀，因為一張攬實合照被瘋傳緋聞，當時樂仔仲好搞笑講過，如果過幾年小儀冇人要，自己就娶小儀做老婆。o依家樂仔結婚喇，但新娘卻不是小儀。
小儀昨日接受《蘋果》電話訪問，對於樂仔結婚表示：「非常之開心，我啱啱喺公司走，Donald嗌出嚟：『嘩，阮小儀，你睇吓，余文樂結婚呀！』我冇乜理佢，佢再話：『真㗎！余文樂真係結婚㗎！』跟住睇佢張相，原來堅結婚，戥佢開心！見佢張相好開心好幸福，睇到佢哋啲笑容，係滿瀉嘅快樂湧晒出嚟。」
對於樂仔曾「承諾」娶自己，但o依家新娘換咗人，小儀笑說：「咁我o依家都未知有冇人要，未到最後一秒鐘，佢唔使承諾呢個最初應承嘅嘢住嘅，係咪？佢結婚之嘛；同埋佢都睇好我啦，即係話我有人要啦。當然去到最後，一定祝佢哋白頭到老，永結同心，永遠幸福快樂，我諗佢都有排忙。」
至於小儀拍檔森美以短訊回覆：「Haha……恭喜佢！當你話佢同小儀拍拖個打擊實在太大喇，佢都忍唔住要話畀大家聽，真正愛人係邊個。」
(蘋果日報)
