邵音音今日到觀塘為奇妙電視節目《使乜驚 大兩Gen》拍攝，佢又提到當年患上皮膚癌，但仍堅持生大仔一事，佢話：「86年喺美國生仔，醫生乜都驗，佢話我有皮膚癌唔可以曬太陽，同埋懷孕會難產，流血，皮膚癌發作，佢哋冇辦法控制，要我一定簽紙，因為我堅持生，如果我死咗同佢哋無關，我都願意，但呢啲嘢冇同屋企人講，怕佢哋要我落咗細路哥，好彩我生咗個仔。」
問佢係咪一直有醫治皮膚癌﹖佢掀起少少衫領話：「冇得醫㗎，我條頸有少少黑色，就係皮膚癌，漸漸變成紫紅色、黑色、然後就皺皮、跟住泡出嚟好似有水，慢慢就會變得好大，所以呢度要割，呢條唔係頸紋，有段時間我個頭要歪住行，醫生話我從此個頭會歪咗，因為都大塊，我問佢要唔要攞大脾塊皮補上去，佢話唔補得，要睇住情況變化，入面係生咗幾千粒幾萬粒好似黑痣咁嘅嘢，醫生要花幾個鐘頭去挑。」
係咪要KEEP住食藥去治療﹖佢話：「冇藥食㗎，就係唔曬得太陽，唔好刺激皮膚，幾10年我淨係用番梘洗面，嗰啲養顏素、營養素，總之鋪喺皮膚上都有化學成份，我都盡量避免，我都估唔到阮兆祥攞嚟講，我冇嬲佢，佢都冇惡意，不過都好慘，我有好嚴重嘅心臟病，有啲人唔識講嘢，我聽到又唔LIKE，咁就唔係咁好，所以我個女今日話有記者就匿埋，怕我有事，盡量以後唔好提。」
提到佢可有同家人商量過自己嘅後事點搞﹖音音姐話：「咪燒咗去，掟落海，做乜要留俾人懷念啫，不如生嗰陣對我好啲。」係咪唔停工﹖佢話：「呢啲係幸福，例如我唔舒服，痛，心跳呼吸唔好，我瞓喺床度靜靜哋，我唔會同仔女講，我仔女一知道就唔准我拍戲，唔准我打牌，呢樣唔食得嗰樣唔食得，佢哋太愛我，又唔知我幾時死，可能10年，又可能3日後，但呢3日我想做我想做嘅嘢，所以我想飲酒瞓覺，佢哋會買枝酒俾我，用更多時間陪我！」
另外，同場嘅林鈺洧23歲生日，製作組準備生日蛋糕，音音姐即時帶領大家唱英文版同中文版嘅生日歌。林鈺洧指願望係工作順利，身體健康，又透露男友會同佢慶祝生日；問到爸爸有冇同佢慶祝﹖佢笑住話：「佢淨係同我講咗句生日快樂，利是都冇封。」
(蘋果日報)
