薛家燕喺96年離婚，獨力照顧三個仔女。二仔石耀庭早前宣佈結婚，明年6月喺洲際酒店擺酒，除咗送家傳之寶畀新抱，仲贈逾千萬西半山豪宅作為佢哋嘅新居，真係有媽的孩子…好幸福呀！
喜事停不了，原來家燕姐孻女石耀珠都畢業喇，仲要係香港大學碩士畢業添，真係恭喜晒！噚日大女石祐珊喺ig貼出一家四口合照，留言：「Proud of this little one today ❤（為今天的你而驕傲） 」
耀珠着住畢業袍戴埋四方帽，笑得好開心，家燕姐更加係盛裝打扮，穿上鮮黃色裙披紅色圍巾，配埋閃耀鑽飾，一身貴氣。
家姐姐今日接受傳媒訪問，佢話﹕「我真係好開心，佢好學不倦，而且熱心公益。I am proud of her.謝謝。」早前家燕透露過囡囡志願係做社工，家燕姐表示囡囡已實踐願望﹕「係呀，佢已經喺母親的Mother’s Choice(母親的抉擇)上班做社工喇。」
想唔想兩個女快啲結婚？佢笑話﹕「哈哈，想呀！緣份未到。(你幫佢哋做媒人？)我自己又忙，隨緣啦，緣份到就到，好奇妙嘅事。」
(蘋果日報)
