陳敏之、江美儀同韋家雄今日喺尖沙嘴出席無綫互動短劇《再親我好嗎》記者會，對於「欄后」呂麗瑤日前在網絡上公開十幾年前遭性侵，麥明詩亦自揭同是受害者，敏之受訪時都坦言十四、五歲時亦試過搭地鐵被掀裙底，感覺極之難受。
敏之話：「以前讀書都有做partime model，多數放學後會着住校服去casting，咁成身拎住好多嘢，又包又衫。有次坐港鐵好逼人，突然覺得後面好涼，感覺到有人揭我裙底。當時真係好想喊，面都紅晒，我就發咗癲喺度嗌，原本咁逼嘅環境下，大家都可以再退一步，但就冇人敢認。」之後敏之就衝出地鐵，由於唔知道邊個係「變態佬」，就一路喊住返屋企話畀屋企人聽。而呢次事件後，佢都有陰影，佢話：「一世都記得啦，o依家搭地鐵都會黐牆企，同擺個狠樣出嚟。」所以佢絕對贊成設立女性車廂，同鼓勵女生學防狼術，並會教導囝囝雷冬至學習正確嘅性教育知識。
(蘋果日報)
