藝人張達倫喺早前十月嘅時候就宣布囝囝終於出世喇，仲改咗囝囝個花名叫做「勁秋雞」，而一直都話未改好囝囝個中文名嘅張達倫，今日就喺社交網上載咗段片，並宣布已諗好囝囝個中文名，就留言表示：「各位Uncle Auntie ，勁秋雞改左（咗）中文名啦！想知我叫咩名⋯睇片啦 #勁秋雞 #中文名」
片中見到抱住囝囝嘅張達倫就話：「大家好，見我打好晒tie，着晒背心，就知道有重要嘢宣布，我改咗中文名喇！英文名就叫做Zachary，花名叫做『勁秋雞』，中文名就叫做張凱碩，所以大家以後就知道我個名叫做張凱碩。」大批網民都留言話凱碩、凱碩，仲話佢眼睩睩，真係可愛到暈，簡直想攬住佢嚟錫呀！
(東方日報)
