85歲胡楓同83歲嘅羅蘭今日穿起婚紗、禮服，喺海洋公園為「愛.永恆」活動擔任大使，見證在場百對長者伉儷再次宣誓，慶祝細水長流嘅愛情，場面感人，謝寧同鄭明明都有出席。
百對長者伉儷一齊穿上婚紗禮服宣誓，慶祝細水長流嘅愛情。
向來風趣幽默嘅修哥甫見記者就笑笑口話﹕「今次係工作，唔好誤會。」羅蘭姐今次打扮得好貴氣，儼如英女皇，修哥仲喺台上獻唱契仔張學友嘅《愛是永恆》。
羅蘭姐喺台上感觸咁話:「今日我真係見到愛是永恆，見到修哥，由佢開始拍拖到結婚我都知，到最後一刻仍喺醫院陪住佢太太。」去年失去老伴嘅修哥忍唔住掩嘴眼濕濕。修哥與太太呂詠荷喺1957年結婚，相愛逾半個世紀，修哥表示自己係地下情始祖，拍拖數年後結婚，但都冇大事宣告。
修哥話﹕「當年冇影婚紗相，要後補影番，老闆(公司)叮囑唔好張揚，所以連睇戲都要分開入場。」明年2月，修哥將會喺紅館再度舉行演唱會，門票反應熱烈，問會唔會加開至10場？佢笑話:「你估我係張學友，唱百幾場都得咩。」
羅蘭姐讚修哥專一情深，一提太太，修哥忍唔住掩嘴眼濕濕。
太太離世一年，修哥每次提起，腦海都有無盡嘅回憶。
(蘋果日報)
