郭羨妮、吳浣儀、麥子樂、陳逸寧等今日喺邵逸夫創意媒體中心出席「獅子山下2017」優先放映會，郭羨妮指花咗兩日拍攝其中一個單元，其中一日更拍咗18個鐘。
好捱得喎！郭羨妮就話：「以前喺無綫開工，試過3日3夜冇瞓，未死得，不過以前後生嘛！」佢話下月23日及24日登台，之後就同家人去日本過聖誕節，趁機「造人」？佢話：「好驚，又講呢啲，其實我急㗎，有得生，仔女都冇所謂。」吳浣儀透露經常冇記性，曾經試過3次煲湯唔記得熄火，開門又唔記得拎鎖匙，有人提議佢要睇醫生，佢話：「係可以，因為都危險，o依家好神經質，成日睇下有冇開火。」麥子樂表示兒時睇《人在邊緣》，入行後一直已經好想同吳浣儀合作，如今夢想成真，佢話：「佢好媽咪，成日諗做佢個仔會點呢！」吳浣儀笑住話：「我喺呢行好多仔仔女女，個個都紅架！」對於邵音音患癌，吳浣儀同麥子樂大讚對方為人樂觀，人好夠義氣，希望音音姐開開心心。
(蘋果日報)
