陳錦鴻今日帶埋太太杜雯惠同囝囝陳駕樺，到薄扶林協康會綜合服務大樓，為大樓內嘅壁畫參與創作，向來較少帶囝囝出席公開活動嘅錦鴻表示：「之前駕樺喺兩歲嘅時候確診患上自閉症，當時好彩得協康會幫手，所以每次佢哋有活動都會盡量出席，大家互相幫忙。」
陳錦鴻透露，囝囝今年十歲學習能力不俗：「成績總算中上，最初嘅時候搵一對一教師教，佢試過考第一添，後來我哋想佢學識跟同學仔相處，即使做錯，成績唔好都無所謂，最緊要畀佢自己感受吓。」為照顧駕樺，陳錦鴻近年都屬半停工狀態，佢話其實戲癮一直都有：「不過就要好謹慎咁選擇角色，因為佢諗嘢冇我哋咁立體唔識得分，如果佢一陣見到爸爸喺電視入面做殺人犯、強姦犯，佢會以為係真，所以要過多幾年先。」錦鴻又話其實囝囝都一路有叫佢出去做嘢：「 不過囝囝正值青春期，想喺身邊陪住佢，畀多啲指導佢。」佢仲講笑話：「O依家佢開始話想拍拖，想識女仔，會注意自己儀容，仲同我講話第時想結婚生仔，我話好呀，係就最好啦，聽到開心晒。」
(蘋果日報)
