薛家燕、胡楓(修哥)、羅蘭、梁舜燕同Joe Junior，噚晚喺將軍澳一間酒店出席曾醒明創辦嘅《送暖到泰北35週年慈善晚會》。其中家燕姐已經擔任愛心大使20年，今日特登現身支持，佢話：「曾生好有心，搞咗呢個活動好多年，幫助咗好多喺泰國北部嘅難民，為佢哋起學校又教小朋友讀書寫字。」
家燕姐透露，細女石耀珠早前都有去泰北參與義工活動，佢話：「細女出發前我先知原來佢自己一個人去，到當地同啲美國讀書嘅同學一齊做義工，但我自己覺得好唔放心好危險，於是就打畀曾生，託佢幫我聯絡泰北當地嘅院長。佢哋好幫手，每日都向我匯報囡囡嘅行蹤近況。」仲話細女返香港之後覺得好開心可以幫到人，立志做社工幫更加多嘅人。而修哥就話最近忙於準備演唱會：「依家拍緊兩套劇，另外又要為演唱會綵排，係有啲辛苦，因為我好多嘢要講又要記歌詞，到時要唱好多歌。」講到台上有字幕機，咁修哥咪唔使記得咁辛苦，修哥話：「我盡量都唔想用字幕機，因為你望住部機嚟唱，感情係冇咁好。」記者笑修哥較譚詠麟更加好記性，可以唔睇字幕機，修哥講笑話：「我冇譚詠麟咁叻，冇佢唱得咁好，不過可能記性好啲。」幸好修哥話兩套劇集就嚟拍完，咁可以專心為演唱會做準備。
(蘋果日報)
