67歲嘅邵音音曾經是一代性感艷星，近年活躍電影圈，拍過《春嬌救志明》、《全力扣殺》、《低俗喜劇》等電影。今日阮兆祥喺商台《一圈圈》節目內，透露音音姐噚晚出席一個慈善晚宴時，有感而發分享經歷，透露自己患上癌症，但唔打算醫。不過佢好專業，仲有表場表演唱歌助慶。祥仔事後透過公關回覆﹕「吳麗珠搞嘅聖雅閣福群會，係關於胃癌慈善晚宴，音音姐講感受時，簡單講咗幾句，我知都得咁多。」
邵音音今日接受周刊電話訪問時話：「我細細個十幾歲就發覺生癌，周身都係，係天生遺傳。」咁身體邊個部位先發病？她稱：「皮膚癌，我頸部做過好多手術，後來身體又有心臟病。」至於可有接受治療？音音姐表示：「病咪去睇，不停發，依家除咗個腦冇。」她謂多年來一直低調抗癌，因為不想被煩：「我想避免人關心，大家問我，變咗好奇，好似想我快啲死。病人係唔想講情況，病人想忘記佢係病人，想開開心心。病人需要休息，噚晚開始大家係咁打嚟問，我唔鍾意人哋問，人都要堅強生存，多一日算一日。」音音姐話分享生癌只係向病人發送正能量，佢話：「我唔想不停答去滿足大家好奇，我要瞓覺，要熄電話。」
(蘋果日報)
