藝人李亞男現身中醫診所開幕，着上吊帶裙微晒線頭，她直言希望在這兩年有小朋友，要早一、兩年調理身子。問是否與老公王祖藍已有共識生幾多個？她說：「想一個先，但上帝畀兩個我都好嘅，一仔一女可以收工。（想要仔定女先？）仔定女都冇所謂，通常話第一個仔似媽咪多啲，都想似自己。（係咪似你高啲？）我成日講笑唔好晒咗我高度。」問祖藍平日工作忙碌可有配合，她表示最重要身體調理得好，要多飲中藥及湯水，又指老公不抗拒睇中醫：「佢平時感冒都係食中藥，好傳統。（會諗定生仔秘方？）唔研究啦，坊間好多方法，多準備同計時間會搞到緊張會咩都冇，所以順其自然。（依家緊張？）又未去到，唔係話想有就即有，需要時間。」
成日跌祖藍禮物
談及日前（25日）李亞男33歲生日，她表示與老公提早到日本慶祝，品嘗當地魚生。問吃生冷食物如何調理身子，她說：「我跟佢食㗎，佢好鍾意食刺身，去日本唔食呢啲會好浪費，要開始戒口。（收咗咩禮物？）返到香港先補番。（送個仔囉？）呢個禮物幾好。（送時間畀你造人？）Quality Time啦，唔好成日返工，我哋又唔係好物質，同埋成日跌送畀對方的禮物。（送過咩？）送過件好有意義，佢好鍾意嘅卡通衫，做嘢時漏低咗，而佢送過條頸鏈我唔知擺咗喺邊，不過佢又冇嬲。」她表示睇過本書講述當中包含付出、質量時間、語言、接觸及送禮物：「而我哋嘅Love Language最主要係付出同質量時間，同埋每日都有同對方講I Love You，當時有時要彼此提醒。」
訪問完之後，李亞男獲中醫師把脈，事前問可有機會是喜脈時，嚇得她抹一額汗，結果中醫師說：「佢係健康嘅脈，陰陽平衡，係有時瞓得唔好。」
(東方日報)
