前藝人倪詩蓓出席活動，她表示現時會專心留在香港照顧患有嚴重自閉症的兒子Royce：「佢抽到間特殊寄宿學校，都十幾年冇返嚟香港，唔係好習慣啲天氣。（好大犧牲？）咁自己個仔，但都幾辛苦。作為自閉症兒子嘅母親，生活都好艱難，唔容易行到呢步，精神同心理上都好大傷害。」她表示自閉症兒童會有發脾氣迹象，傷口要數都數不完，因此寫了一本書講述自己奮鬥故事，好讓其他父母作參考處理事情：「都完成晒，會喺台灣發行，我曾經都喺嗰邊發展都有十年以上。」
她又指着手上的膠布，笑言是聖誕禮物：「成日都有，啲朋友話我屋企冇嘢多，膠布最多。（小朋友有時都會抓到？）會，但我個仔算好，因為好多都有啲敏感動作，會傷害到自己身體或者身邊人。（最深刻係點？）兩年前屋企跌親，夜晚十二點幾我又起唔到身，爬去拎電話叫救護車入院，冇人照顧仔仔都送咗佢去兒童醫院。」她表示當時差不多用了十個月拐杖，很久未有穿過高踭鞋：「高踭鞋唔可以着咁耐，平時要着波鞋，嗰時冇睇醫生唔理佢，就搞到好嚴重，依家行路都會拐吓拐吓。」
有指倪詩蓓是已故天王巨星張國榮（哥哥）的初戀女友，問有否留意哥哥胞姐張綠萍日前因病逝世的消息，她說：「我啲時間比較緊湊，要去學校睇住個仔，冇睇新聞。我呢啲年紀大嘅師奶要喺屋企整嘢食，之後又要拎畀佢。（有冇聯絡？）我冇同香港嘅朋友聯絡，決定去到新加坡時，一個朋友同自己生活都冇，由朝到晚要照顧小朋友，自閉症嘅人身體上少咗一種荷爾蒙，愈夜愈精神，每晚三、四點先瞓，我呢十三年每日瞓得四小時，依家習慣咗瞓唔到。（會出席喪禮？）返到嚟冇聯絡，我諗都唔會，每日畀晒時間個仔。」
問與前夫黃玉郎可有聯絡，她重申離開香港與所有人沒有聯絡，每天的生活與思想都是兒子。她表示兒子17歲，快將成年：「又係麻煩，唔好以為自閉症唔識講嘢唔麻煩，會唔識表達自己。」
(ON.CC)
