29歲嘅梁洛施(Isabella)喺13年同坐擁340億身家嘅李澤楷分手，回復單身嘅Isabella，專心湊8歲大仔長治及一對7歲孖仔H&N，不過喺呢個月初，有周刊影到Isabella終於有新感情，同年約40多歲嘅四眼男喺圓方約會，喺撐枱腳期間，Isabella同新歡全程好似糖黐豆，仲狂啜33次。事後Isabella透過經理人冇否認，只係話私人事唔回應。
今日再有報道話，一直同三個仔喺加拿大定居嘅Isabella，喺李澤楷安排下，搬返嚟香港居住，短期內都唔會離開。本來Isabella一家被安排入住數碼港，出入都有保鑣跟身，但係o依家佢又新戀情，為咗唔俾人長期監控，決定搬屋兼換過一批保鑣，兼且出入都寧願搭的士。雖然感情生活有著落，但Isabella依然將大部份時間專注喺三個仔嘅身上，早前仲影到佢帶咗一對孖仔H&N去淺水灣公園玩，兩子精力無限，個樣一個似爸爸李澤楷，另一個就似足爺爺李嘉誠，難怪深得爺爺歡心。報道仲話有知情人士透露，Isabella同李澤楷有共識，基本上李澤楷唔會干涉佢嘅私生活，只要好好照顧三個仔就可以，所以Isabella會先搞掂個仔嘅日常事務，夜晚先出去拍拖。
有指梁洛施同李澤楷有共識，拍拖都唔可以忽略三個仔。(資料圖片)
回復單身嘅梁洛施，一直專心湊仔。(資料圖片)
(蘋果日報)
