《溏心風暴3》噚晚就播出咗第一集，一班演員都要忙住四出宣傳，黃宗澤（Bosco）日前就同埋一班演員，出席喺鰂魚涌舉行嘅活動，活動大約兩點幾結束，Bosco就好似好趕咁，即刻跳上七人車就離開，七人車直駛去咗尖沙嘴海港城，喺呢段短短嘅車程，Bosco煙癮起，唔單只喺車廂煲煙，仲將夾住煙嘅手伸出車窗外㖭！
Bosco喺車入面除咗煲煙之外，仲嚟個大變身，因為見佢落車嘅時候，已經換好咗衫，今次都係好似好趕咁，一支箭咁標落車，直入咗海港城入面一間酒店，助手為咗跟貼Bosco，都越行越快，而Bosco大約喺酒店留咗1個小時左右離開，然後再由尖沙嘴經落馬洲去深圳。
(蘋果日報)
