河國榮今日喺柴灣為ViuTV節目《晚吹—有病有真相》錄影，佢透露大約3年前有胃酸倒流情況出現，令佢一度沙聲唱唔到歌，佢話：「當年5月我去擺檔（賣D.I.Y.飾物），突然好紅，好多訪問，當時以為係傷風感冒，到6、7月仲係沙聲，於是我去睇耳鼻喉科，佢話我胃酸倒流令我沙聲，好慘呀！有啲訪問要我唱歌，一個音都維持唔到，啲人話『你仲話識唱歌，唱得咁難聽！』。」河國榮表示當時好唔開心，佢苦笑話：「4月練聲唱歌係靚到絕，唱個幾鐘都唔會有事，5月突然間就冇晒聲，本來仲諗住可以錄音出唱片，跟住停咗乜都冇。」
由於河國榮唔信得過藥廠，所以佢唯有選擇戒口，佢話：「不過好難戒，最好方法係盡量唔好買零食，如果要買就買細包，另外我會自製乳酪，同埋張床整斜咗，床頭升高咗7吋，因為一瞓低胃酸就會倒流，不過o依家情況已經好咗好多。」
(蘋果日報)
