【林珊珊自幼管教好嚴】單親家庭長大冇缺失：仲多咗愛

林珊珊跟前夫李啟淦所生嘅囡囡李澄（西瓜）同李怡（野人），花名反射性格，人如其名。西瓜同野人日前喺葵芳接受周刊專訪，兩姊妹話雖然單親家庭長大，但一啲都冇缺失，異口同聲話仲多咗愛。

到底多咗啲愛邊度嚟？原來林珊珊同李啟淦離婚後各組新家庭，李啟淦跟第二任妻子生咗一名囝囝，西瓜同野人就係咁多咗個細13同11年嘅同父異母細佬，兩位家姐錫到細佬燶。

西瓜話：「爸爸媽咪分開，佢哋各有另一半，我哋多咗兩個屋企，變成『四親家庭』，細個有兩個爺爺、嫲嫲，多咗兄弟姊妹，所以唔缺失，反而增多咗愛。細佬讀書叻，善解人意同好乖，好enjoy同我哋傾偈，唔會嫌我哋老餅，好錫我哋兩個。」

30歲西瓜同28歲野人年齡只差兩年，佢哋話細個會「隔離飯香」，乜都爭，「媽咪偏心」係野人慣性口禪，西瓜亦話：「細個時，當媽咪話我唔啱，我就話佢偏心過骨。」

西瓜從長輩口中得知童年時曾出陰招推跌當時學行嘅野人：「妹妹到o依家都論盡，會撞柱。」野人承認總係行路唔帶眼：「唔係掛住睇嘢，就係其他嘢，我唔想影響到側邊人，我會直行，甚至撞埋燈柱，好彩家姐扶持我好多。」

西瓜話父母自幼管教好嚴：「細時父母教我哋兩樣嘢，做事要堅持到最後，同做到最好，唔係要成才，態度最緊要，父母冇迫我哋學好多嘢，但一定要完成。爸爸重視成績，媽咪重視我哋對人態度，嚴厲程度一樣。」　孭住「星二代」個名，有人覺得學係護身符，有人覺得有壓力？西瓜話：「冇乜壓力，冇乜優惠，冇乜唔好，平凡唔係在於你身份，係在於你做緊乜嘢事，有啲人孭嘅背景都可以選擇做平凡嘅事，係個人心境選擇，唔關任何事，睇一個人點去面對人對事。」

野人都好認同：「我覺得係心態，呢樣嘢喺外面，壓力係自己畀自己，大於外面畀自己，我冇得去介意晒所有人點睇。」當西瓜遇上困難要求助，佢話唔會搵媽咪林珊珊，亦唔會搵兩位舅父林海峰同林曉峰，佢求救有門：「梗係搵叻人幫手，叻人係我哋婆婆呀，邊個生佢哋（林珊珊、林海峰、林曉峰），梗係搵佢哋嗰個源頭啦。」野人就話家姐西瓜永遠係佢SOS求助熱線：「我o依家返工填緊急電話聯絡人都係家姐。」西瓜不忘搞笑一番：「保險受益人，鑽石委托人都填埋家姐吖。」

(蘋果日報)