「長腳蟹」呂慧儀今日喺太子始創中心出席聖誕宣傳活動，見佢一開口講嘢聲沙沙，原來患上重感冒之餘，3歲嘅阿仔黃柏翹（Anton）噚晚突然急性腸胃炎，搞到要立刻帶囝囝去醫院，嚇到佢鼻哥窿都冇肉。
呂慧儀話同阿仔食嘢都一樣，自己腸胃冇事，但阿仔就病得好突然，估計佢係因為周圍摸嘢衰多手受到感染，呂慧儀話：「仲嘔到我成身都係，換咗三次床單，好彩唔使留醫院，真係嚇死我，我成晚做人肉按摩椅，第一次見阿仔病得咁嚴重，佢仲扭計要我一齊同佢見醫生，搞到我原本只係少少感冒，經過噚晚搏鬥之後，今日變咗重感冒喉嚨都沙埋。」
呂慧儀老公黃文廸就負責睇住兩個病人，今日要幫手湊仔。今個聖誕節呂慧儀要開處境劇唔可以放長假去旅行，計畫去香港一啲酒店玩下同囝囝感受聖誕氣氛 ，囝囝現時已經四歲大，呂慧儀話阿仔識行識走仲識駁嘴，叻過我哋兩公婆。
(蘋果日報)
