39歲嘅孫燕姿上星期二因為感冒，取消原訂於上星期六喺台灣舉行嘅專輯簽名會，不過據台灣《蘋果日報》報道，真正嘅原因係孫燕姿又有喜喇！報道指孫燕姿為老公納迪姆懷上第2胎，加上高齡產婦身體不適，為咗避免工作奔波，先會取消所有通告安胎靜養。
空穴來風，未必無因，孫燕姿本月初喺台灣嘅宣傳活動已預告，下年要生第二胎，原因係5歲囝囝表示想要個弟弟或者妹妹，孫燕姿又覺得：「我有這個空間」佢又話如果幸運懷上第2胎，將會全面停工安胎。
咁啱喺上星期六凌晨5點，孫燕姿喺微博撰文：「半夜餓醒是一種折磨。」當時已經有有fans估佢成日餓醒，係有喜先兆。孫燕姿近期無於公開活動亮相，外界難以得知佢高齡產婦身體不適嚴重情況，不過孫燕姿喺前日就放咗張相上facebook，見佢坐喺樓梯影相，但就用攬枕遮肚，未知係咪刻意遮擋鏡頭視線。
孫燕姿於11年與老公納迪姆結婚，兩人現時育有5歲囝囝，孫燕姿於傍晚透過經理人否認懷孕表示：「沒有懷孕，但很想有，希望承媒體金口」。
(蘋果日報)
