譚小環老公蔡強榮（Eric）早前爆出患上早期肺癌，幸好發現及時，Eric立即入院接受手術，小環話佢切咗右邊上下肺葉嘅一半，將壞細胞全部切除，出院後仲乖乖戒咗煙，飲食同生活習慣都改晒，一切以健康為主。
Eric話呢次命大，大步檻過，佢要更加注意健康，出院後深居簡出，調理身體。今日佢終於出動，還更新facebook貼圖，相中見他同一班女士去飲茶，不見小環。Eric精神唔錯，明顯身形清減咗，他還留言道：「昨天覆診，康復進度理想，線都拆埋了。感恩，一切真的回復正常了。另外多謝一眾C奶（師奶）老朋友們關心，呢排瘦咗白咗靚仔咗，受C奶歡迎程度直迫G啫近（G-Dragon），祝大家都身體健康，開心快樂每一天。」
有周刊今日打畀Eric問近況，聲線響亮，佢話：「進度理想，之前我做手術，腋下開咗兩刀，手術後要開窿插喉放血水、放氣，出院就掹咗喉，即使微創手術，傷口都四吋長，噚日去咗拆線，有個疤痕。」
Eric話出院休養有戒口，最開心成功戒煙，佢話：「以試過戒咗係咁想食嘢，結果戒煙變肥，重到200零幾磅，未病前我有190幾磅，病咗跌到170幾磅，依家肥番，約重180磅。今次戒煙好成功，我聞到人食煙都覺得臭。」
Eric話呢次大病好番，決定半退休嘆世界，佢話：「一個病攞走晒所有嘢，唔再咁博啦。」Eric話未病前本計劃今日同老婆小環同外父外母四人行去大阪，下月再去泰國，依家做咗手術，唔敢周圍去，佢擔心飛機有氣壓同多細菌，出埠旅行延到明年一月去東京。」
(蘋果日報)
