吳若希（Jinny）今日到新城宣傳新歌《你在我心間》，著住露腰裝嘅佢話已經成功修身，依家仲瘦過未生BB前：「以前都冇咁fit，依家反而嫌太瘦，想塊面漲啲。」係咪老公唔畀你食咁多？佢話：「佢餵唔飽我，依家佢好少帶我出去食嘢，之前就成日帶我去酒店食好嘢，依家就唔帶我出去威。」
日前Jinny玩直播時意外令豪宅大廳曝光，佢話：「唔係豪宅，呢個size嘅屋企係澳門係正常，唔算大屋，依家住得舒服，其實遲啲都諗住買間大啲嘅屋俾小朋友。」又話依家已經睇緊樓：「希望有三千呎，會有我、老公、BB、兩個工人，有時佢啲屋企人同我細佬又會嚟。」
講到預算，佢話：「錢唔講啦，總之平過香港好多，澳門千幾呎嘅話都只係幾百萬。」
講到囡囡，佢話噚日囡囡出第一隻牙：「我仲伸手入去摸佢隻牙，佢隻牙依家係得一條線，同埋佢依家會有好多動靜，會扭抱又會學行，總之好可愛，搞到唔捨得返工。」
(蘋果日報)
