現年81歲嘅謝賢早前參與內地綜藝節目《寶貝的新朋友》，與一班小朋友大晒溫馨「爺孫情」，唔少網民都話估唔到鐵漢謝賢都有柔情一面。喺最新一輯節目預告中，因為小朋友一句不禮貌說話，謝賢當住鏡頭面前起腳踢小朋友的屁股，呢一腳火速引起網民熱議。
節目中謝賢與一位五歲的小男生做拍檔挑戰隔代教養嘅問題，當一班人去到一間小食店時，謝賢問小拍檔想食乜，小拍檔唔想食嘢冇反應又唔回答，謝賢就對住鏡頭慨嘆話自己個小拍檔成日都唔食嘢，小拍檔好似唔甘心畀謝賢咁話，立即大聲反擊：「今天一天到晚都是吃吃吃吃，是吃貨呀？」謝賢聽到小拍檔咁講，疑似不滿對方冇禮貌即刻起腳輕輕踢咗小拍檔屁股一吓，當時其他在場人士也嚇呆了。
後續發展如何就要等節目播出街先清楚，有網民就覺得無論小朋友點錯都唔應該體罰，仲話謝賢教小朋友嘅方法已經過時，不過好多有睇開節目嘅網民都讚謝賢一直對小朋友都好有愛心，就算小朋友扭計都會耐心說教，喺節目入面從來都冇亂對小朋友發脾氣，相信今次都係玩嘅成數多於體罰，仲話謝賢嘅行為只係表現出同小拍檔好Friend。
(東方日報)
