因為拍大台劇《老表你好嘢》而紅咗嘅張繼聰，近年可以話劇接劇，有好多仲係佔戲好重，得寵程度好過唔少生親生仔。不過今日有周刊報道，有指佢老闆蕭定一喺14年同大台合作拍電影版《十月初五的月光》，佘詩曼因拍攝超時要補水，仲有金額約94萬未收到，無線就根據阿佘嘅合約而向蕭定一嘅公司追討，結果令阿聰無辜扯落水而被封殺！
報道話本來有唔少監製諗住搵阿聰拍劇，但係突然收到高層通知，唔可以再用阿聰，連綜藝節目都唔例外，搞到大家都覺得好奇怪，唔知係咪呢個原因，喺台慶同EYT嘅節目都唔見阿聰嘅蹤影！不過因為台慶劇《誇世代》o依家熱播中，所以暫時仲會見到佢出席活動，報道仲話雖然阿聰嘅曝光率低咗，就反而多咗時間陪老婆謝安琪同一對仔女，享受家庭樂。況且佢對自己都有信心，一來老闆正力捧，二來手頭上又有唔少工作！蕭定一接受周刊訪問，佢就覺得係有人唔知聽到啲咩嘢，係度煽風點火，事實上最近佢哋亦有人搵BabyJohn拍劇，所以唔係好信呢件事。蕭定一仲話係公司想避一避唔拍劇，希望阿聰先拍電影，可能因為呢個原因而有誤會。
(蘋果日報)
