台灣藝人林志穎，結婚7年多，育有三名兒子，分別係大仔Kimi，同一對雙胞胎Jenson、Kyson，唔知係咪恨女心切，噚日佢就喺微博同fb貼咗對孖仔嘅相，但啲相就見到對囝囝，竟然係囡囡嘅女僕打份，真係可愛得嚟又好鬼抵死！
睇番啲相，見到林志穎俾咗Jenson和Kyson分別着住藍色同粉紅色女僕圍裙，除咗手袖有蕾絲邊外，下半身裙子部分，仲有兩個大大蝴蝶結，而Jenson同Kyson都擁有一雙渾圓大眼，加上超長睫毛，睇落又真係幾似小女孩㗎，毫無違和感，唔講真係以為係一對孖女。
林志穎仲留言話：「以後請叫我坑娃的爹，把他們扮成女僕玩辦家家酒，看他們的裝扮真是可愛極了，希望以後長大看到爸比發的微博不要生氣喔」。
好多網民見到都留言大讚孖仔好可愛，仲叫林志穎快啲追多個囡囡，「好可愛喔，再努力一點生個女娃娃」、「感覺你應該再生個女兒」，小志咁多網民撐你，你都加把勁啦！
(蘋果日報)
