藝人吳綺莉（Elaine）上月底報警稱寓所失竊約十七萬蚊財物，之後阿女吳卓林承認返過屋企攞嘢，仲話唔知媽咪會報警，經過呢件事之後，兩母女關係疑再度緊張。
適逢尋日係卓林18歲生日，原來Elaine都有同卓林慶祝，今晚仲喺社交網上載兩個人嘅合照，雖然Elaine分別用一個心心同月球圖案遮住個樣，但睇個嘴已經認到係佢兩母女，仲見到佢哋嘴角微微向上，似心情唔錯，而佢哋捧住嘅生日蛋糕亦寫住「18th」字樣，Elaine仲留言話：「做人要進步，加油努力，感謝天父，每天都在感恩中。」睇嚟佢兩個嘅關係已經雨過天青。
Elaine接受訪問，佢話：「佢正日生日要同朋友、同學慶祝，過完正日，點都要同佢阿媽（即吳綺莉）慶祝嘅！」點解唔晒正面照呀？佢話：「唔使啦，低調啲算！」有冇送禮物？佢笑住話：「梗係唔係我送啦，我養咗咁多年，係都係佢送番畀我啦！」
(on.cc東網)
